Эд хөрөнгө асуулт

1. Асуулт: Би Сүхбаатар суманд байрлах орон сууцныхаа өмчлөх эрхийн гэрчилгээг хайгаад олохгүй байна. Гэрчилгээгээ дахин авахад хэд хонох вэ?
Хариулт: Та доорх бичиг баримтыг бүрдүүлэн Сэлэнгэ аймгийн Улсын бүртгэлийн хэлтэст хандана. Үүнд: – Өргөдөл /орон сууцны хаяг болон дахин авах шалтгаанаа бичсэн байна/ – Гэрчилгээг хүчнгүйд тооцуулах тухай зарыг өдөр тутмын сонинд зарлуулан сонинг эх хувиар нь хавсаргана. – Үйлчилгээний хураамж 20 000 төгрөгийг тушаасан баримт зэрэг болно. /ЗГ-ын 2010 оны 237 тогтоол/ Дээрх баримтыг үндэслэн улсын ерөнхий байцаагчийн шийдвэрээр гэрчилгээг хүчингүйд тооцож, ажлын 15 хоногийн дотор таны гэрчилгээг дахин олгоно. /Эд хөрөнгийн эрхийн улсын бүртгэлийн тухай хуулийн 5 дугаар зүйл/
2. Асуулт: Миний нэр дээр газар өмчлөх шийдвэр гараад Газрын албанаас автал улсын бүртгэлийн байгууллагад очоорой гэсэн. Би хаана хандаж, ямар баримт бүрдүүлж өгөх вэ?
Хариулт: Та доорх баримт бичгийг бүрдүүлэн Сэлэнгэ аймгийн Улсын бүртгэлийн хэлтэст хандана. Үүнд: – Мэдүүлэг /Улсын бүртгэлийн хэлтсийн хүлээн авах цонхнооос авна/ – Монгол Улсын иргэнд газар өмчлүүлэх тухай шийдвэр ийн эх хувь, – Газрын кадастрын зураг /эх хувь/, – Газрын төлөв байдал, хянан баталгааны дүгнэлтийн хуулбар зэргийг бүрдүүлж өгнө. Үнэ төлбөргүй бөгөөд ажлын 5 өдрийн дотор эрхийн улсын бүртгэлд бүртгэх эсэхийг шийдвэрлэж мэдэгдэнэ. /Эд хөрөнгийн эрхийн улсын бүртгэлийн тухай хуулийн 10 дугаар зүйл/
3. Асуулт: Би Сэлэнгэ аймагт байрлах орон сууцаа худалдах гэж байгаа юм. Ямар материал бүрдүүлэх вэ, хэдэн төгрөг тушаах вэ? Хаана хандах вэ?
Хариулт: Та доорх баримт бичгийг бүрдүүлж, Сэлэнгэ аймгийн Улсын бүртгэлийн хэлтэст  хандана. Үүнд: – Мэдүүлэг /бүртгэлийн байгууллагын хүлээн авах цонхноос авна/ – Худалдах, худалдан авах гэрээ эх хувь /тухайн үл хөдлөх эд хөрөнгө оршин байгаа дүүргийн тойргийн нотариатчаар гэрчлүүлсэн байна./ – Өмчлөх эрхийн улсын бүртгэлийн гэрчилгээ /эх хувь/ – Үйлчилгээний хураамж энгийн бол 20 000 төгрөг /ажлын 3 хоногт/, яаралтай бол 40 000 төгрөг /ажлын 8 цагт/ тушаасан баримт/ /ЗГ-ын 2010 оны 237 тогтоол/ – Үл хөдлөх эд хөрөнгө худалдан борлуулсны 2%-ийн татвар төлсөн баримт /Худалдах ,худалдан авах гэрээнд тусгагдсан үнийн дүнгээс тооцно./ зэрэг болно. /Эд хөрөнгийн эрхийн улсын бүртгэлийн тухай хуулийн 11 дүгээр зүйл/
4. Асуулт: Би өөрийнхөө нэр дээр эд хөрөнгө байгаа эсэх лавлагааг авах гэсэн юм. Хэд хоноод гарах вэ? Хаана хандах вэ?
Хариулт: Та цахим үнэмлэх болон хурууны хээгээ ашиглан Төрийн үйлчилгээний цахим /ТҮЦ/ машинаас 1000 төгрөгөөр шууд авах боломжтой. Хэрвээ иргэний цахим үнэмлэх гэмтэлтэй ч юм уу, хурууны хээ уншигдахгүй алдаа гарч байвал, мөн хуулийн этгээд болон итгэмжлэлээр лавлагаа авах гэж байгаа бол Сэлэнгэ аймгийн Улсын бүртгэлийн хэлтэст доорх баримт бичгийг бүрдүүлэн хандаж болно.Үүнд: – Мэдүүлэг /бүртгэлийн байгууллагын хүлээн авах цонхноос авна/ – Үйлчилгээний хураамж энгийн бол 5 000 төгрөг /ажлын 5 хоногт/, яаралтай бол 10 000 төгрөг /ажлын 8 цагт/ тушаасан баримтын хамт өгнө. /ЗГ-ын 2010 оны 237 тогтоол/
5. Асуулт: Би Сэлэнгэ аймгийн Сүхбаатар суманд амьдардаг. 700 м.кв газар өмчилдөг. Энэ газраасаа дүүдээ талыг нь бэлэглэх гэсэн юм. Ямар баримт бичиг бүрдүүлж хаана хандах вэ?
Хариулт: Та эхлээд Сэлэнгэ аймгийн тойргийн нотариатч дээр дүүтэйгээ хамт очиж 700 м.кв талбайтай газрын 350 м.кв талбайг нь бэлэглэх гэрээг байгуулна. Байгуулсан бэлэглэлийн гэрээний нэг хувийг Сэлэнгэ аймгийн Газрын албанд өгч газрын кадастрын зургийг 2 хуваалгаж тус тусд кадастрын зургийг гаргаж авна. Үүний дараа дүүтэйгээ хамт доорх бичиг баримтыг бүрдүүлэн Сэлэнгэ аймгийн Улсын бүртгэлийн хэлтэст хандаж тус тусдаа мэдүүлэг гаргана. Үүнд: – Мэдүүлэг / бүртгэлийн байгууллагын хүлээн авах цонхноос авна./. – Бэлэглэлийн гэрээ – Газрын кадастрын зураг – Газар өмчлөх эрхийн гэрчилгээ /эх хувь/ – Үйлчилгээний хураамж тушаасан баримт: Таны хувьд 700 м.кв талбай нь 350 м.кв болж өөрчлөгдөж байгаа учраас 8000 төгрөг, таны дүүгийн хувьд үлдсэн 350м.кв талбайтай газрыг бэлэглэлийн гэрээгээр авч байгаа учраас 20000 төгрөг тушаана. /ЗГ-ын 2010 оны 237 тогтоол/
6. Асуулт: Манай ах эгч 2 Солонгост ажиллаж амьдардаг. Ах, эгч 2-ын нэр дээр байдаг. Сэлэнгэ аймгийн орон сууцыг би өөрийнхөө нэр дээр шилжүүлэхийн тулд яах ёстой вэ? Ах эгч 2 Солонгост гэрээ хийгээд элчин сайдын яамаар дамжуулан ирүүлвэл бүртгэж өгөх үү?
Хариулт: Сэлэнгэ аймгийн орон сууцны өмчлөх эрхийг шилжүүлэх гэрээг зөвхөн Сэлэнгэ аймгийн тойргийн нотариатчаар гэрчлүүлэх ёстой. /Нотариатын тухай хуулийн 7.3/ Дээрх тохиолдолд ах эгч 2 нь Монголд байгаа хүнд итгэмжлэх эрх өгөөд, уг итгэмжлэгдсэн төлөөлөгч нь тантай хамт Сэлэнгэ аймгийн тойргийн нотариатч дээр очиж гэрээ байгуулан гэрчлүүлнэ. Үүний дараа бүртгэлийн байгууллагад хандана.
7. Асуулт: Манай хүүхэд байрны гэрчилгээн дээр зураг зураад, зарим үг үсэг нь харагдахгүй болгочихжээ. Би гэрчилгээгээ шинээр солиулж болох уу?
Хариулт: Болно. Энэ тохиолдолд таны гаргасан хүсэлтийг үндэслээд улсын бүртгэгч ажлын 10 өдрийн дотор гэрчилгээг дахин олгоно. /Эд хөрөнгийн эрхийн улсын бүртгэлийн тухай хуулийн 5 дугаар зүйл/